Թուրք սուլթաններն անգամ չեն ունեցել Էրդողանի չափ լիազորություններ. թուրքագետ Ռուբեն Մելքոնյան
Թուրքիայում տեղի ունեցած սահմանադրական փոփոխություններից դեռ շատ առաջ նախագահ Էրդողանն արդեն չեզոքացրել էր այն բոլոր հավանական գործոնները, որոնք կարող էին ակտիվանալ հանրաքվեի ձախողման կամ հետընտրական գործընթացների ժամանակ: Թուրքագետ Ռուբեն Մելքոնյանը, մեկնաբանելով հանրաքվեի առանձնահատկությունները, ընդգծում է՝ Էրդողանի «դե ֆակտո» մեծ լիազորություններին գումարվում են նաեւ «դե յուրե» լիազորությունները:
«Ընդ որում՝ ֆանտաստիկ մեծ հնարավորություններ: Թուրքիայում ոչ մի նախագահ նման լիազորություն չի ունեցել, անգամ հանրապետական Թուրքիայի հիմնադիր Աթաթուրքն երբեւէ օրենքով օժտված չի եղել նման լիազորություններով, նա եղել է խորհրդարանական պետության թույլ լիազորություններ ունեցող նախագահ, այլ բան է, որ այդ լիազորությունները մեծացրել է իր խարիզմայի շնորհիվ»,-պարզաբանում է թուրքագետը:
Այսպիսով, ըստ Մելքոնյանի, Ռեջեփ Էրդողանը խախտում է այդ ընդունված ավանդույթը եւ իրեն համարում ոչ թե Աթաթուրքի ժառանգը, այլ ըստ էության՝ սուլթան Աբդուլ Համիդի: «Վերջին թուրք ղեկավարը, որն ունեցել է օրենքով ամրագրված նման լիազորություններ՝ եղել է Աբդուլ Համիդ երկրորդը, անգամ նրանից հետո սուլթանները չեն ունեցել նման լիազորություններ»,-շեշտում է թուրքագետը:
Էրդողանի քաղաքական մեսիջների, սուլթանական գործողությունների եւ ատրիբուտների մասին փորձագիտական պարզաբանումները՝ «Պարադիգմ» հաղորդման շրջանակում:
