«Գործ չտալը» կեղծ հայկական արժեք է. Դավիթ Գյուրջինյան
Եվրոպական արժեքներ, հայկական ավանդական արժեքներ եւ ձեւափոխված, խեղված խորհրդային արժեքներ. սրանք հիմա պայքարի մեջ են, թե որը պետք է թելադրող լինի: Լեզվաբան Դավիթ Գյուրջինյանի խոսքով՝ հիմքում պետք է պահենք մեր ավանդականը, բայց օգտվենք նաեւ այլ արժեհամակարգի լավ արժեքից: «Պիտի օգտվենք ուրիշ արժեհամակարգում եղած լավից, դա օգուտ կտա թե ազգին, թե պետությանը»,-ընդգծում է լեզվաբանը:
Անդրադառնալով Ազդարարի ինստիտուտը իբրեւ «գործ տալու» ինստիտուտ ընկալմանը եւ «հայերին ոչ հարիր» ձեւակերպմանը՝ Դավիթ Գյուրջինյանն ընդգծում է, որ «գործ չտալը» կեղծ հայկական արժեք է: «Եթե արդարության ջատագովը դառնում է «գործ տվող», ապա սա եւ տխուր է, եւ զվարճալի, եւ մտահոգիչ, որովհետեւ այս ձեւակերպումը բակի տաղավարից չի հնչում, այլ Ազգային ժողովից: «Գործ չտալը» հայկական արժեք չէ, դրանք կեղծ հայկական արժեքներ են կամ էլ մի խավի մտայնություն է, որն ուզում է իր շահը պաշտպանել: Այսինքն՝ չուզողը որոշակիորեն այդ խավի ներկայացուցիչն է եւ այդ մտածողության խոսափողը»,-նկատում է նա: «Գործ չտալու» խորքային պատճառներից մինչեւ «համր մտավորականներ». այս ամենը՝ «Պարադիգմ» հաղորդման մեջ:
